Umugwi w’Urunani BBC uhejeje gutsinda bimwe bikomeye umugwi wa Beau Vallon Heat wo muri Seychelles

Kuri uyu muhingamo umugwi w’Urunani BBC uhejeje gutsinda bimwe bikomeye umugwi wa Beau Vallon Heat wo muri Seychelles amanota 112 kuri 43, rukaba rwari urukino rwabo rwa kabiri bakinye mw’ihiganwa rya ROAD TO BAL ritanga uburenganzira bwo gukina inkino za BAL2025 zihuza imigwi yabaye iya mbere mu bihugu vyaboririko ribera mu gihugu ca Tanzaniya.

Mwomenya ko umugwi w’Urunani BBC, bitegekanijwe ko uzokina urukino rugira gatatu k’umunsi w’ejo, igenekerezo rya 18/10/2024, bazotana mu mitwe n’umugwi witwa Nairobi City Thunder wo muri Kenya, igihe c’isaha cumi na zibiri (18h00′) mu masaha yo mu Burundi, n’isaha imwe y’ijoro (19h00′) mu masaha yo muri Tanzania.

Ikindi co kumenya n’uko umugwi w’Urunani BBC uri mw’itsinda rimwe n’umugwi GNBC wo muri Madagascar, JKT wo muri Tanzaniya, Nairobi City Thunder wo muri Kenya, na Beau Vallon yo muri Seychelles iyo bahejeje kunyagira.