Reta y’Uburundi yaramaze gufata ingingo yo kurondera umufatanyabikorwa kugira haboneke indege zishobora kwitirirwa “Burundi Airlines”

Umushikiranganji mu vyo ajejwe harimwo gutwata abantu n’ibintu, Marie Chantal Nijimbere, yavuze ko gushika ubu Reta y’Uburundi imaze gufata ingingo ndetse iratanga intumbero yo kurondera umufatanyabikorwa kugira irondere indege zishobora kwitirirwa ishirahamwe “Burundi Airlines”. Ico gikorwa rero ngo caratanguye ndetse haramaze no kuboneka abakorera muri ico gisata bafise indege basaba gukorana na Reta kugira haboneke indege za Burundi Airlines. Vyashikirijwe n’uwo mushikiranganji yishura ku bibazo vy’abashingamateka, itariki 12 Kigarama 2024.

Mwomenya ko ku mwaka, Uburundi biciye mu kigo kijejwe uruja n’uruza ku kibuga c’indege mu Burundi (Autorité de l’Aviation Civile) bwinjiza amafaranga yababa imiriyaridi 10 biciye mu ruja n’uruza rwo mu kirere, biciye mu ma “services” atangirwa kuri ico kibuga.

Umushikiranganji yavuze kandi ko iyo indege ihinduriwe inzira, haba uruhombo rutari ruto. Atanga akarorero k’igihe amatara yari yacitse ku kibuga mpuzamakungu citiriwe Melchior Ndadaye, aho indege Brussels Airlines yaciye ija kurwa muri Uganda. Rumwe mu ruhombo ruba, nuko ingezi ziba zije kurara hano i Burundi biba ngombwa ko zirara ahandi. Abashingamateka bakaba barasavye ko abo vyega boshiramwo inguvu hakaboneka indege yitirirwa igihugu (Burundi Airlines), nk’uko bimeze mu bindi bihugu vyo mu karere.