RDC : Umukuru w’igihugu Félix Tshisekedi yaraye ahinduye uwurongoye igisirikare FARDC n’abandi bayobozi bakuru

Kuri uyu wa 19 Kigarama 2024, umukuru w’igihugu ca Republika Iharanira Demokarasi ya Congo (RDC) yaraye ahinduye umukuru w’igisirikare c’igihugu (FARDC) n’abandi bayobozi bakuru. Lt Gen Christian Tshiwewe Songesha yahora ari umukuru w’ingabo za RDC kuva muri Gitugutu 2022 yasubiriwe na Jules Mbanza Mwilambwe yadugijwe kw’ipete rya Lieutenant Général, uwahora ari icegera c’umuyobozi w’ibiro bijejwe igisirikare mu ngoro y’umukuru w’igihugu, akaba yari ajejwe cane ibikorwa vya gisirikare n’ubutasi.

Abandi bashizweho nk’uko vyemejwe mw’itangazo ryaciye kw’iradiyo n’imboneshakure nkuru y’ico gihugu, RTNC, Lt Gen Tshiwewe yagizwe umujenama wa Perezida Tshisekedi mu vya gisirikare. Lt Gen Ichaligonza Nduru Jacques yagizwe icegera c’uwujejwe ibikorwa vya gisirikare n’ubutasi. Yasubiriye Gen Maj Jérôme Chico Tshitambwe.

Abandi bayobozi bashizweho ni bande?

Gen Maj Chico yagizwe umuyobozi wa zone ya gisirikare ya mbere, ihuza intara ya Kinshasa, Kwango, Kwilu, Mai-Ndombe, Kongo Central, Equateur, Mongala, Nord-Ubangu, Sud Ubangi na Tshuapa. Uwo musirikare yari yarahawe ibikorwa vyihariye vyo kuyobora ingabo ziri ku rugamba rwo kurwanya umuhari witwaje ibirwanisho wa M23 mu ntara ya Kivu ya ruguru.

Lt Gen Pacifique Masunzu yagizwe umuyobozi wa zone ya gatatu muri FARDC, ihuza intara ya Kivu ya ruguru, Kivu y’Epfo, Maniema, Ituri, Tshopo Bas-Uélé na Haut-Uélé. Nayo Gen Maj Makombo Muinaminayi Jean Rogr yagizwe umuyobozi w’urwego rw’ubutasi, Brig Gen Malume Oderwa agirwa umuyobozi ajejwe ibikorwa vya gisirikare, Brig Gen Mbuyi Tshivuadi agirwa umuyobozi ajejwe ubutegetsi bw’igisirikare.

Mwomenya ko Tshisekedi ahinduye izo ngabo, mu gihe abarwanyi ba M23 bakomeje kwigarurira ihuriro ry’ingabo za RDC ibice bitandukanye mu karere ka Lubero. Uko gutsindwa kukaba ari nakwo kwatumye Lt Gen Tshiwewe na Gen Maj Chico, basabirwa gusubirizwa.