Abantu bataramenyekana igitigiri barahitanywe n’igihuhusi “Chido” mw’izinga rya Mayotte

Abantu baba mw’izinga rya Mayotte barahuye n’ikiza c’igihuhusi kidasanzwe citwa “Chido”. Ico gihuhusi Chido ngo cari gifise umuvuduko w’ibirometero 200 kw’isaha (200km/h), kikaba carasambuye amazu, kironona imihora y’umuyagankuba, kiraca itumatumanako, kironona kandi n’imihora ishikana amazi mu bisagara, carahitanye abantu n’ibintu kuva ku wa gatandatu igenekerezo rya 14/12/2024.

Ubuzima mw’izinga Mayotte bumeze gute?

Izinga rya Mayotte, ni izinga riherereye mw’ibahari Indiyano (Océan Indien), rikegukira igihugu c’Ubufaransa. Iri zinga riri muri za ntara zegukira ubufaransa ziri ahatandukanye, rikaba ryagiye kwemera kumadikwa ku bufaransa mu mwaka w’2011. Mayotte rigizwe n’utuzinga duto duto dutanu rikaba hafi y’amazinga ya Madascar n’ibihugu nka Mozambique.

Mu bantu 310.022 baba muri iryo zinga, bivugwa ko boba bakomotse mu bihugu bivuga indimi z’abantu (Langues Bantoue). Iri zinga rero risanzwe riri mu bice bikenye cane vy’ubufaransa, ubu rikaba riteye ikigongwe inyuma y’uko amazu meshi abomaguritse. Mwomenya ko gushika ku musi w’ejo igenekerezo rya 16/12/2024, abantu basize ubuzima muri ico gihuhusi bataribwamenyekane. 

Ubufasha butari buke bukaba buriko buratangwa, ndetse hakaba hategekanijwe n’ikigandaro. Mu makuru atangwa n’ikinyamakuru CNN na France 24, bivuga ko igihuhusi nk’ico hari haciye imyaka 90 kitibonekeje muri ako karere. Bakemeza ko zimwe mu mvo zatumye Chido kiba igihuhusi gikaze, ari ihindagurika ry’ibihe hamwe n’ubushuhe bw’amazi y’ibahari bwaduze cane.

Abimukira baharurwa hagati y’100.000 na 200.000 bari bamenyeshejwe ivy’ico kiza imbere y’uko ico gihuhusi gishika, ngo bahungire mu bibanza vyari vyateguwe vyo guhungiramwo, ariko abimukira bakaba baratinye kujayo kuko ata vyangombwa bafise, ngo bibazako ari umutego batezwe kugira babafate.